Heit wert Bröet gebochn
ba dr Kuchlarn ze Gurgl.
Lengescht sein olle ausn Riedlan zomkehmen, um bein Stoanöfn vo de Jocköbn Broet ze bochn.
A niedr hot sein oagenen Toag brocht. Auf sal auhn, hobn se in gonzn Winter genüeg Broet gehobn. Heit bochn leimeh de Jocköbn salt. Und sal ö lei, weil die Enkelin an tern Grint hot und sich ols oazige ban Nalan durchdarsetzt.
Sal ischt eppan nuicht aso oafoch, weil is Nale vo enat her ischt und no darzue is se a Kuchlarn. Die lot sich nuicht gern in de Korten schaugn ödr eppan gor beluxn.
Obr ietz zen Broet bochn:
Zen bochn vo Becknbreatlan brauchts Geduld und Kroft. man kannt ö sogn: Wellness-und Fitnessstudio inklusive.
Gestr an Ergetog hobn mr in Zubr ingebeaklt. Heit in oller Herrgottsfrieh ingeheflt. Weiln mr aufs augehn vön Toag wortn, wert in dr Stuben und in Bochöfn örntlach ingekentet.
Ietz werts onstrengend. Es wern ba de 20kg Roggnmehl und wolltan gleich viel Becknmehl zen Dampflan darzue gemischt und guet zom geknetet. Is Nale lahrt noch ihrn Güettunkn Wosser und Solz drzüe. Lei aupassn dass es ´nt ze raße wert!
Es wert geknetet, nöhamol geknetet und nöhamol, nöhamol ...
Lengescht hot dos mei Monn geton, set is Nale, dos ischt Mannerorbat, oafoch ze schwar fir a Gitscha.
Ober is Eklele zoagt ´dr Ömen, dass es ondart ö geht und knetet mit brinnroetn Grint in Toag durch. Do hat ´mr ietz is Fitnessstudio!
So!
Deckl zue, Leintüech drau und ietzt a Raschtle. Wellness welln mr woll Ö!
Obr na, weiln dr Toag geht, geit at Mittog.
Eppas gahes, zen preschtern hob mr koa Zeit.
A Woazans Mües, a Schneemilch ödr eppas sellas holt.
Ietz!
braucht ´s a zwoametrige Lotten, oane noch dr ondren.
Det strahn mr Grischn drau.
Oftr mochn mr aus ´n Toag sella pflaschate Tarle und tien de sall atz Brett.
De Lotten legn mr auf ´n Tiwan, und auf a niede Lotta kemen Nölpn, dass dr Toag nö Plotz hot zen gehn. Sischt tat ár auf ´n Brett pickn.
De Nölpn wern olbn scho gemarcht, dass man woas wer ban bochn darbei wor und ö dr Toag, der pickn bleibt, dorf nuicht weckgeriblt wern.
De Nölpn sein teilweise sö olt, dass nt ámol is Nale woas wer drau gsudlt hot. Sie ischt ert 1960 züeha gezöhn.
Weiln mr wortn, strieln mr aweg in die oltn Nölpn umenondar.
Dar elteschte den mr nö darlesn ischt vo 1904.
Mei, wol a oltz Hölz. Und ö dr Toag ischt ibr 100 Johr olt.
Gewaltig!
Oar vo de Büebn ischt ietz ö kemmen zen halfn. De Lotten mitn Bröet tien mar ietz in de Ebissa zen okieln. Det hilft ins nö a Madle vö dr Kuchlarn. De oan Kinder kemmen lei meh olle pött amol ze Bsüech, die sein auf oll Weite.
Is erte Bröet ischt gahe durch. Weil dr Öfn isch nö völle hoaß.
Ö an Zaltn moch mr glei mit, weil wenn dr Öfn schön amol ba brinnen ischt.
In de leschtn Toagpotzn knetn mr Zeltnzuig ( Nussen, Zwebn, Kletzn....) inhn. und schtreichn ´s mit an Goggelan in.
Dr Zaltn vo dr Kuchlarn ischt kuglat nuicht longelat wie der ausn Gschäft. Sallewegn weil dr Öfn zelescht numma so viel Kroft hot.
Sischt war ar an Pfinztoge nö nuicht fertig!
In leschtn Odruck bsinnt si dr Büen Speckwirfle inhn ze tien.
"Wie wars mit ar Schokolade ödr ar Nutella," locht ar.
Bolts fertig ischt, muess es a poor Toge auskieln.
Natirlach wert eppas frisch gessn, obr is moaschte, wenn ´s durre ischt, kimmt at de Dilla ödt in Kaldr.
De durrn Becknbreatlan sein a gsunts Knapperzuig so nebnbei. Zur Marende ödr augewoacht in dr Suppen.
Ze Lebzeitn hot dr Nene olbn gset:" Wenn éts enk de Zehnde nuicht putztet, sam kuiets zemindescht a herts Breatle." Schmezlt is Enkele.
So!
- Nölpn o onschreibn,
- Zubr auswaschn,
- Öfn züe
- und fertig!
Dr Tog geht hinewarts und de Sunna kuglt ö schön ibars Egge.
Ö in Nalan mit ihrn 80 Johrnen, is gleich wenn widr a Ruhe inkehrt.
Obr worscheinlach lei bis in Langes, weil in Enkelan tauget is bochn. und ö an Brunnenkögl war ins is Bröet fir ´n Summr nt an Wege. Schaugn mr amol wo bis det gschicht.
Det mar i mi widr. Obr öhne ar sellan Litanei
Enker Hittenwirt vö öbn döbn
E, dos Gschreibewarch konnschte ö auf deitsch lesn.
Ach, diesen Text kannst du auch auf deutsch lesen.
Im Blog: Zurück zum Ursprung
Mehr Artikel vom HÜTTENWIRT auf: derhuettenwirt.jimdo.com
Kommentar schreiben
Birgit Bauer (Freitag, 08 Juli 2022 08:37)
Danke für den schönen Bericht... in Himmel auen...und wieder zurück
Viele Grüße aus Saarbrücken
Birgit